ထုတ်ပြန်ကြေငြာချက်များ

၂၂၆ နှစ်မြောက် ရခိုင်အချုပ်အခြာ အာဏာကျဆုံးနိန့် ရခိုင်ပြည်အမျိုးသားကောင်စီ ANC ၏ သဘောထား ထုတ်ပြန်ချက်။

                                                        နေ့စွဲ။  ။ ၃၀၊ ၁၂၊ ၂၀၁၀

            ယနေ့သည် ရခိုင်ပြည်အချုပ်အခြာအာဏာ ကျဆုံးခဲ့သည့် (၂၂၆) နှစ်မြောက်နေ့ဖြစ်သည်။ ယခုကဲ့သို့ ရခိုင်တမျိုးသားလုံးဆိုင်ရာ နေ့ထူးအခါထူးများတွင် ကမ္ဘာ့ထောင့်အသီးသီး၌ ရောက်ရှိနေကြ သော ရခိုင်အမျိုး သား အမျိုးသမီးများနှင့် အဖွဲ့အစည်းများက မိမိတို့တိုင်းပြည်နှင့် လူမျိုးအား ၁၇၈၄ခုနှစ် ဇွန်န၀ါရီလ(၁)ရက်နေ့တွင် ဗမာဘုရင် ဘိုးတော်မောင်ဝိုင်းက မတရားဝင်ရောက် သိမ်းပိုက်ခဲ့ပြီးနောက် နှစ်နှစ်ရာကျော် ကြာမြင့်ပြီးသည့် တိုင်အောင် လူမျုိးခြားလက်အောက်၌ ဒုက္ခမျိုးစုံ တို့ဖြင့် ကမ္ဘာ့အခက်ခဲ အကျပ်တည်းဆုံး ဒေသစာရင်း ထဲ၌ ရှိနေသေးခြင်း၊ လက်တွေ့ ဖြစ်ရပ်မှန်ကို အမှန်အတိုင်း ကမ္ဘာက သိရှိအောင်နှင့် မိမိတို့ အချင်းချင်း ကြားတွင် အမျိုးသားရေးအသိစိတ်ဓါတ်များ ပိုမိုပြင်ထန် ခိုင်မာလာစေရန် ရည်ရွယ် ချက်များဖြင့် တခန်းတနား စုဝေးဟောပြောပွဲများ၊ ဆန္ဒပြခြင်းနှင့် ထုတ်ပြန်ချက်များ ထုတ်ပြန်ခြင်းများပြုလုပ်လျှက် ရှိကြပေသည်။ ဤသို့ပြုလုပ်ကြခြင်းသည် အမျိုးသား ရေး လှုပ်ရှားမှုတခုဖြစ်၍ ပြည်တွင်းပြည်ပ နှစ်ဌာနလုံးမှ ရခိုင်ပြည်သူများအားလုံး မိမိတို့ လက်ရှိ အနေအထားကို ပြန်လည်စီစစ်ခြင်းနှင့် အတိတ်က ပြိုလဲခဲ့ရသည့် ရခိုင်ဂုဏ်သိက္ခာကို ပြန်လည် ဦးမော့စေလျှက် အနာဂါတ် ခြေလှမ်းများစွာအတွက် ဖြစ်နိုင်ဖွယ်ရှိသော ရှေးလုပ်ငန်းစဉ်များကို ချမှတ်အကောင်ထည်ဖော်ဆောင်ကြရန် အားမာန်တင်းတင်း ယုံကြည်ချက်အပြည့်ဖြင့် စတင်ကြိုး ပမ်းသည့် သဘောလည်းဖြစ်ပေသည်။ သို့ရာတွင် ယခုကဲ့သို့ ပင်ပမ်းခံ လုပ်ဆောင် ကြရခြင်းအတွက် နိုင်ငံရေး အနှစ်သာရပြည့်ဝ၍ အလားအလာကောင်းများကို မျှော်လင့်နိုင်ဖို့ရန်လည်း အထူးလို အပ်ကြောင်း သတိမူသင့်ကြပေသည်။ အလားအလာကောင်းဆိုရာ၌ ယခုကဲ့သို့ ရှည်လျားလှသော ကျွန်ပြုခံသက်တမ်းကို တတ်နိုင်သမျှ လျှော့ချရပ်တန့်၍ ရက်စက်ယုတ် မာလှသော ရန်သူ၏ လက်ခုပ်ထဲမှ အပြီးတိုင် လွတ်မြောက်အေးချမ်း တိုးတက်သာယာသော ရခိုင်လူ့ ဘောင် တည်ဆောက်ရေးကို မျှော်မှန်းနိုင်ခြင်းပင်ဖြစ်သည်။ အပြင်ဘန်းက ကြည့်သည်ဖြစ်စေ၊ အနှစ်သာရ အားဖြင့် ကြည့်သည်ဖြစ်စေ ယခုကဲ့သို့ အချုပ်အခြာ အာဏာကျဆုံးအခန်းအနားများ၏ တူညီသော ဦးတည်ချက်မှာ အချုပ်အခြာအာဏာကို ပြန်လည်တည်ဆောက် နိုင်ရေးပင်ဖြစ်ကြောင်း သိသာထင် ရှားနေပေသည်။

သို့ဖြစ်၍ ဤမျှအထိ မြင့်မားကြီးကျယ်သော မျှော်မှန်းချက်ကို ထားရှိကျင်းပသည့် နိုင်ငံတကာ ရောက် ရခိုင့်အသိုင်းအ၀ိုင်းများအနေနှင့်ရော၊ စိတ်ဓါတ်အရဖြစ်စေ အားပေးထောက်ခံသူများ အနေဖြင့် ပါ ပွဲပြီးမီးသေ၊ ကျင်းပပြီး ပြီးရော ပုံစံမျုိး မဖြစ်သင့်ပဲ ဤမှဖြစ်ပေါ်လာသော အမျိုးသား စိတ်ဓါတ်ကို ဆက်လက်ထိန်းသိမ်းလျှက် လက်တွေ့ကျသည့် တော်လှန်ရေး အခန်းကဏ္ဍတွင် မိမိတို့ တစ်ဦးချင်းစီ ၏ ကိုယ်စွမ်း၊ဥာဏ်စွမ်း တတ်စွမ်းသရွေ့ ပါဝင်လုပ်ဆောင်မှုကို တိုးမြှင့်သွားသင့်ပေသည်။ တော်လှန် ရေးဟူသည် နိုင်ငံရေးသမားများ။ လက်နက်ကိုင်ပြောက်ကျားတပ်ဖွဲ့များနှင့်သာ သက်ဆိုင်သည့် အရာမဟုတ်ပဲ ရခိုင်သားတိုင်းနှင့် သက်ဆိုင်၍ တော်လှန်ရေး အောင်မြင်ခြင်း (သို့မဟုတ်) ရှုံးနိမ့်ခြင်း အကြောင်းတရားနှင့် အကျိုးသက်ရောက်မှုများမှာလည်း ရခိုင်သားတိုင်း၏ တာဝန်နှင့် ပါဝင်လုပ် ဆောင်ကြမှု အတိုင်းအဆနှင့် တိုက်ရိုက်သက်ဆိုင်ပါသည်။ သို့ဖြစ်၍ တော်လှန်ရေး အထမြောက် အောင်မြင်သည်အထိ ရခိုင်တမျိုးသားလုံး လက်ချင်းယှက်လျှက် လက်တွေ့ကျကျ စည်းလုံးညာစွာဖြင့် တဆင့်ပြီးတဆင့်တိုးမြှင့်၍ ဆက်လက်တိုက်ပွဲဝင်သွားကြရန် လိုအပ်သေးပါကြောင်း ထုတ်ပြန်လိုက် ရပေသည်။။

ပုဂ္ဂိုလ်ရေး၊ အုပ်စုရေး ရပ်တည်လှုပ်ရှားမှုများကို အမျိုးသားရေး လှုပ်ရှားမှုအသွင်သို့ တိုးမြှင့်ကြ၊

လူငယ်မျိုးဆက်သစ်များအနေဖြင့် ပုဂ္ဂိုလ်စွဲ။ အုပ်စုစွဲ။ ၀ါဒစွဲလောင်းရိပ်ထိုးမခံပဲ လွတ်လပ် သွက်လက်စွာ

 လှုပ်ရှားကြ၊ မတရားကျူးကျော် အုပ်ချုပ်သူမှန်သမျှ အမြစ်ပြုတ် တိုက်ထုတ်ကြ ၊ ၊

ရခိုင်ပြည်အမျိုးသားကောင်စီ(ANC)

ဗဟိုဌာနချုပ်။

နယူးဒေလီ။

အိန္ဒိယ